تاشيرة شينجن وخطة بعيده المدي

تاشيرة شينجن حلم الشباب للسفر لاوروبا والتي اصبحت صعبه المنال حاليا مما ادي للذهاب عبر البحر وركوب الامواج في مخاطره تنتهي دائما بالفشل والموت الا فيما ندر بجانب خساره حياه الانسان اغلي مايملك وآلاف الجنيهات يشفطها سمسار البحر ويختفي طبعا

وبحسبة بسيطة فان المركب الذي يستطيع حمل 100 شخص يدفع كل منهم مالا يقل عن 50 الف جنيه فان هذا السمسار يستولي علي 5 ملايين جنيه طبعا ويهرب مع عصابته ويترك الشباب يموت

وحقيقي امر محزن فمن يملك 50 الف جنيه ممكن عبر خطة بعيده المدي ان يحصل عليها لكن تتطلب الصبر والشديد ودقه التخطيط

اولا يجب ان ندرك ان الان اغلب السفارات الاوربية تقريبا اصبحت تتعامل مع شركة تدعي / vfsglobal.greece/ وهي شركة بريطانيه ادارية تتولي مهمات استلام الاوراق وفحصها وتوصيلها للسفارات وتوصيل جوازات السفر بالرفض او القبول للعملاء مقابل عمولة تلهفها منك بالطبع بجانب رسوم التاشيرة التي هي ثابته 60 يورو بالسعر الرسمي 600 جنيه في كل السفارات الاوروبية حيث ان كل دول الاتحاد الاوربي موحده في الرسوم والطلبات والاوراق تقريبا الا في حالات قليلة يتم فيها الغلاسة لدولة مثل النمسا او قمة الغلاسة مع ايطاليا

ولناتي للتجربة العملية نفرض انك مثلا سافرت لاوروبا بالبحر واهلك لديهم 50 الف جنيه ومنحوها للسمسار متي ستردها لاهلك بالطبع بعد العمل في اوروبا ومتي ستحصل علي عمل لا احد يعلم وحتي ان حصل ستكون اسود / اي بلا اقامة رسمية / بما يعني انك ستحصل علي الفتات من اجك ففي اليونان مثلا الحد الادني للاجور 40 يورو في اليوم وستحصل في احسن الاحوال علي 15 يورو فقط وان كان عجبك

لذا فان العقل والمنطق يقول ال50 الف استطيع ان استثمرها بشكل افضل للحصول علي تاشيرة سياحية للدخول رسميا وان اعمل خلال فتره تنفيذ الخطة في استثمار تلك الاموال ... كيف هذا

فلنبدا في الخطة ... اولا تقوم بفتح حساب في بنك مصري حكومي الاهلي nbe مثلا لمميزاته الكثيرة وانتشار فروعه والات صرف نقوده .. الخ الخ وطبعا ستحصل علي بطاقة صرف نقدي / atm  / وتقوم بعد ذلك بالحصول علي عقد ايجار مخزن ووحده سكنيه تابعه لها باعتبارك تاجر تحتاج مكتب اداري او مخزن كبير وملحق به اوضه بمنافعهم لانك بالطبع لست سويرس انت تاجر صغير تجتهد لتعمل ولا ترمي اموالك في مكتب مكيف وسكرتيرة تتجوزها عرفي وتشغلها ببلاش .. يجب ان تفكر بتفكير موظف السفاره الذي يري اوراق امامه وهم مصريين يفرزون الورق والرأي النهائي للقنصل لمنح التاشيرة ولكن راي الموظف المصري او الاجني في بعض الاحيان الذي يعمل في مصر منذ عده عقود وهارسها هو الاساس وليس سرا ان اغلب العاملين في السفارات من رجال الامن السابقين او المخابرات او الحاصلين علي دورات مع الاجهزة الامنيه للحصول علي نظره مختلفة علي الاوراق والاشخاص وبخاصة في دول العالم الثالث

وطبعا تلك الاجراءات وخاصة في مصر تستلزم اسابيع ولكن في النهاية انت في الطريق الصحيح ولم تخسر شئ لان اموالك في البنك والمكان الذي اجرته باسمك ممكن يكون بتاع حد قريبك عايز مكان او مخزن وتتفق معاه علي كده او حتي تاجره من الباطن بعد كده بالاتفاق مع مالك العقار

وناتي لاهم شئ بعد ذلك ان تحصل علي سجل تجاري وبطاقة ضريبية وطبعا تلك الاوراق تستلزم فتح حساب اخر في البنك باسم الشركة الخ الخ ولكن بواسطة محامي متخصص من السالكين وبعده جنيهات تستطيع ان تحصل عليها خلال اسبوعين او ثلاثة

وحتي الان يكون قد مر قرابة شهرين وحسابك اصبح له شهرين شغال وطبعا لازم تسحب وترد في تلك الفتره ماتسيبوش مكشوف لانك تاجر ولان كشف الحساب يجب ان يكون فيه حركة وخلال 6 اشهر علي الاقل لما تقدمة للسفاره وليس حساب عامله امبارح رامي فيه مليون جنيه ورايح لهم طبعا هتترفض

شخصيا كان حسابي فيه اقل من 5 الاف جنيه لما رحت حصلت علي تاشيرة اسبانيا ولكن الكشف من اول السنه فيه حسابات رايحة جاية وشيكات وحولات وتحصيل ورايح جاي بمبالغ صغيرة وكبيرة ومتوسطه ومصري واجنبي يعني حساب بجد

المهم طبعا انت في الفتره دي لازم تكون بتشتغل علشان تصرف علي نفسك مش لازم شغل دائم بس اي حاجة ولان مش كل يوم بتروح تخلص ورقك ومش علطول وساعات بالليل مع المحامي وساعات بالنهار مع البنك وساعات بتقعد شهر مافيش حاجة

وطبعا الفلوس اللي سالفها او بتستخدمها احسن حاجة ليك اسحب حوالي نصها من البنك واشتري بيها جنيهات ذهب لانها مش بتخسر لما تبيعها عكس المشغولات وكمان كل يوم الذهب بيزيد ولما تيجي تقدم بعد 7 او 8 اشهر تبقي تقريبا لميت ثمن الاوراق والتقديمات والمحامي ..

دلوقتي انت عديت 6 اشهر علي الشركة وعلي الايجار وعلي البطاقة الضريبية والسجل التجاري وليك نشاط واضح من حساب رايح جاي وشغل جوه مصر

نيجي بقي للتقديم علي التاشيرة .. انت رايح فين رايح سياحه طب لو متجوز يبقي لازم تقدم انت ومراتك وعيالك لو فيه عيال علشان تبان انك سايح بجد وتاجر رايح تتفسح بعد شغل شهور

ولو اعزب يبقي لازم تسافر مع الوالدين او العم او الجد يعني يبقي سفر بجد ومع عيله وتتوه وسطيها .. طبعا هتقدموا كلكلم ولو حصل نصيب انت اللي هتسافر وهما لو عايزين براحتهم هتبقي التاشيرة علي جوازات سفرهم

الاول بتخش علي موقع شركه blsspainvisa  وللحصول علي موعد لتأشيرة أسبانيا أو vfsglobal.greece أواليونان او هولندا وعدد من الدول الاوربية الأخري حسب الدولة اللي عايزها وبعدين هتلاقي موقع الشركة تطلب اول حاجة حجز موعد من الاختيارات وتخليك معاه تختار تاشيرة سياحه ومنها هيطلع لك الجدول وتختار اليوم والساعه وطبعا فيه رقم للمساعده لو حصل ليك مشكلة

وبعد ماتملئ بياناتك هيجي ليك رابط علي بريدك الالكتروني تضغط عليه علشان تفعله بموعد المقابلة والساعه والافضل تطبع المواعد والرقم علشان لو رحت تديهلهم علي طول بدل مايدوروا

المهم طبعا الاوراق واحده في كل دول اوروبا تقريبا وهي جواز السفر وصورتين حديثه خد بالك لازم حديثه لان قبل كده خلوني اتصور تاني فوري واتعطلت طبعا وحجز مبدئي طيران وفندق والاستماره تملاها وهتلاقيها علي الموقع تطبعها وتملاها وخد بالك انك لو رايح اي مكان غير العاصمة لازم يبقي معاك تذاكر طيران او قطار او اي مواصله داخلي ودي بقي غلاسة من بعض السفارات زي اليونان وايطاليا فتكتب انك رايح العاصمة روما مثلا ومش رايح منها مكان اخر والفندق طبعا في روما

بالاضافة لتامين صحي دولي بحوالي 200 جنيه في الفتره اللي رايحها وبتعمله من اي شركه سياحه وبيدوك حجز الكيران والفندق الوهمي مجانا معاه وطبعا كشف حساب البنك واكلبه منهم بالانجليزي للسفاره وهما فاهمين ولو كان بالعربي بيكتبوا اسمك زي جواز السفر ويمضوا ويختمه جنيه

واهم حاجة واخر حاجة شهاده التحركات من المجمع بمديان التحرير صحيح هي بكام جنيه بس القرف والزحمه بتاعتها تغور ودي اسرع طريقه روح المجمع في مصلحة الاحوال المدنيه معاك جواز السفر والبطاقة وصور منهم وشوية فكه وخد استمار من العسكري املاها واقف في الطابور وادفع واديهم الاستماره بصور الباسبور والبطاقة تاخد وصل بعد اسبوع او 10 ايام حسب الزحمه والموسم

المهم انك تجيبها قبل ماتروح موعد تسليم الورق وخد بالك كويس جدا ان الاوراق اللي معاك كلها لازم تاريخها ما يعديش الشهر والافضل 15 يوم فظبط نفسك كويس

لان السجل التجاري والبطاقة الضريبيبة معاك الاصل انما الصورة لازم تترجم فدولة زي اسبانيا انت بترجم بنفسك علي ورقه بيضاء انما اليونان لازم يروح الجمعيه اليونانية وياخدوا 150 جنيه علي الورقه ويترجموه بعد 5 ايام وايطاليا لازم يترجم تبع مكاتب في وسط البلد وبياخدوا 200 جنيه علي الورقة علشان كده اتصل برقم الخدمة قبل ماتبدا واتاكد لان كل شوية فيه تعديل في الشروط

مثلا كان يسمح بالا تحصل علي شهاده التحركات طالما فيه تاشيرات شينجن او امريكا علي جواز سفرك ولكن لما رحت اقدم تاني مره ومعايا تاشيرتين شنجن فوجئت ان اسبانيا طلبتها وقالوا لازم تكون موجوده وبعدين اخدوا الورق وقالوا اعملها لانها هتتطلب منك لما السفاره تاخد الورق وعملتها واستنيت يطلبوها ومحصلش وجه جواز السفر بالتاشيرة الحمد لله

وطبعا تصور جواز السفر ولو فيه تاشيرات فيه صورها مع صور من كل ورقك بدل ماتحتاس هناك وتنزل تصور او تصورهم عندهم الورقه ب 2 جنيه تخيل بقي كل الورق ده تصور لك ببتاع 200 جنيه ماتكلفوش 2 جنيه

واليوم الموعود تروح في ميعادك بالظبط يعني لو ميعادك الساعه 11 تروح الساعه 10 ونص وتسحب رقم والساعه 11 بالظبط هيدخلوك وبالمناسبه المكان في الدقي بعد ميدان المساحه قدام مبني مجلس الدوله يعني تتمشي من محطة مترو الدقي لميدان المساحه وتسال عنه العنوان هتطلع من شارع جانبي تمشي 200 متر هتلاقي المبني كله شركات اداريه بس خدمات اسبانيا في ميدان ام كلثوم في الزمالك يعني تركب لمحطة مترو الاوبر وتطلع تاخد تاكسي بعشرة جنيه لهناك احسن واسرع المبني الاداري اللي فيه بنك اتش اس بي سي في الدور الثالث .. وهما فصلوا خدمات اسبانيا هناك من كثرة الناس علي اسبانيا ومافيش مكان فاضي للايجار في مبني الدقي

وطبعا هيراجعوا الورق وبعد كل المراجعات هيطلبوا الفلوس مايعادل 60 يورو يه رسم التاشيرة و حوالي 400 جنيه رسم الخدمات لتصويرك وتبصيمك الكترونيا وبعدين تدفع وتاخد وصل ولو عايز جواز السفر يجيلك علي البيت في القاهره 100 جنيه في المحافظات 200 جنيه وهيجيلك من ارامكس

وبعدين تقعد تاخد دورك علشان هيصورك وياخد البصمات الكترونيا ودي اللي هتتحط علي التاشيرة انشاء الله وبيتاكدوا من الشخصية وانت داخل اي دولة من دول الشينجن بما فيهم سويسرا النرويج وايسلندا بتحط ايدك علي الجهاز يقرأ البصمات

وفي خلال اسبوعين بيجيلك الظرف فيه جواز السفر وعليه التاشيرة انشاء الله او بالرفض لاقدر الله وفيه معاه جواب باسباب الرفض

وعايز اقولك ان الرفض ساعات كثيرة من غير اسباب مقنعه ولكن فيه اسباب مابيقولهاش ولكنها لا ينفع ان تعلن .. مثلا انت مستوفي كل الشروط بس حظك الطين قدمت في يوم كان فيه فرقة الاهلي مثلا مسافر اسبانيا معسكر او لاي سبب وانت مقدم في نفس اليوم هما بقي مابيطلعوش غير عدد محدد من كل سفاره من دول العالم الثالث مثلا 30 تاشيرة وبعثه الاهلي 18 لاعب و 5 اداريين ومدرب يبقي 23 وفيه حد من الاهلي مسافرعلي حسابه مثلا ثلاثة زي عدلي القيعي ومعاه محمد عماره يبقي 28 وهما مابيدوش غير 25 تاشيرة في اليوم يبقي بيدوهم كلهم وبيخصموا تاشيرتين من بتاعه تاني يوم وبخ لكل اللي مقدم حتي لو نجيب محفوظ شخصيا ولو حد مهم قوي او فنان كبير بيقولوا له قدم تاني يوم مثلا

مثلا فريق الاسماعيلي كان مسافر رايح بلد افريقي تبع فرنسا اسمها رينيون جزيرة مشمومه بيلاعب فريقها في كاس الاتحاد الافريقي طلبوهم كلهم ماعدا المدرب لانه هولندي مارك فوتا وسافروا كلهم القاهره وباتوا هناك وراحو الصبح البعثه كلها شافوهم وبصموهم وصوروهم

فلازم تسال كويس وتعرف وتتاكد انك مسافر في موعد كويس واحسن وقت للسفر في شهر مارس وخصوصا لدول جنوب أوروبا اللي جوها زي مصر وهيبقي معقول سياحه فيها في الاول من ابريل عكس هولندا مثلا اللي المطر والجليد فيها في شهر مارس

اهم حاجة تعرفها ان فرنسا وسويسرا تبع شركة ادارية فرنسية وهما فقط عكس باقي الدولي تبع الشركة دي بس كله زي بعضه مصالح واكل عش مع الشركات دي وعلي فكره الشركه الانجليزية اللي واخده الاتحاد الاوروبي واخده تاشيرات السعوديه كمان ومسمينها تساهيل في السعودية يعني زي الهيونداي فيرنا عندنا لما سموها بدل الاكسنت

وان شاء الله خير وبرضة في النهاية دي حظوظ وحاجات بتحصل بتخليهم يزنقوا او يقيدوا التاشيرات بس مايقدروش يمنعوها لانها اتفاقيات دبلوماسية ودولية وحركة طيران وسفر وكمان اكل عيش حلو قوي لان فلوس التاشيره طبعا مابترجعش هما بياخدوا 60 يورو علي الطلب وفيه كل يوم مش اقل من 100 طلب لاسبانيا بس يبقي بيكسبوا كام الف جنيه للسفاره فقط لان المكتب بياخد عمولته اللي هي 400 جنيه لوحديها وده في مكتب القاهره بس فيه قنصلية في الاسكندرية بتجيب اقل حوالي 20 في اليوم يعني متوسط في اليوم 20 الف جنيه اي محل ولا مشروع يكسب كده وده في مصر بس ... عد بقي الجزائر تونس السعودية السودان الخ الخ فالموضوع مربح جدا وخصوصا للدول السياحية ولك ان تعرف ان عدد السائحين لاسبانيا عام 2015 فاق 42 مليون سائح وهي عدد سكانها حوالي 41 مليون نسمة وفي تركيا عام 2014 كان عدد السائحين مثلا 35 مليون و اليونان اللي عدد سكانيها 10 مليون و 800  الف نسمه السائيحن العام الماضي بلغ 22 مليون يبقي دي لقمة عيش حلوه قوي ومش من مصلحتهم منع التاشيرات لانهم عاملين حسابهم ان نص اللي بيخدوها بيهربوا هناك وبيساهما في تقليل الانخفاض السكاني بس مش فاتحينها سبيل لان حد لازم يكون معاه فلوس او ينفعنا باي شكل حتي لو راح يشحت هناك يبقي متعلم مؤهلات معاه لغات مثلا يشحت بالافرنجي هو ده فكرهم ودماغهم ولازم نفكر بيها