اليوتيوب والهجره الي أمريكا بالصدفه

فى يوم بشاهد اليوتيوب شاهدت فيديو بعنوان الهجره لامريكا دخلت اتفرجت على الفيديو كان شخص بيتكلم عن الهجره وبيشرح طريقة التقديم عرفت من الفيديو ان التقديم فيه شروط وهى ان يكون الشخص فوق 18 سنه ويكون معاه على الاقل ثانوية عامه او دبلوم

فى الوقت ده انا كنت 28 سنه ومعايا بكالوريوس تربية وعرفت كمان ان الصورة عليها شروط وهى 5 ف 5 خلفيه بيضا 600 بكسل فى 600 بكسل وممنوع الفوتشوب فها وفى الفتره دى كنت متزوج جديد والى فهمته من الفيديو ان الشخص الى متجوز يقدر يقدم مرتين مره باسم الزوجه وتضيف الزوج معاها ومره باسم الزوج ويضيف الزوجه معه خدت زوجتى ورحت عند استديو فى المنطقه عندنا قولتله الموصفات بتاع الصور وعمل الصور بالظبط وخدت منه الصور على الفلاشه ودى كانت اول فلوس ادفعها 10 جنية صور

ولم روحت البيت نزلت الصور على اللاب وفتحت الانترنت ودخلت اليوتيوب وفتحت الفيديو بتاع شرح التقديم ومشيت خطوه خطوه مع الفيديو وقدمت طلب باسم زوجتى وقدمت طلب باسمى الحمد لله وخدت رقم تأكيد\ / كونفرميشن نمبر / ليا ولزوجتى وعملت حفظ لهم على اللاب والموبايل

وفى الفتره دى انا كنت بشتغل مندوب مبيعات وكان الراتب بتاعى كويس وزوجتى كانت بتشتغل مدرسة فرنساوي فى المدرسه الى فى المنطقه وكان الراتب بردو مش تمام بس الحمدلله على كل حال

بعد فتره التقديم دى كنت بدور على النت دايما عن الحاجات الى بتكلم عن الهجره لامريكا دى او العيشه فى امريكا علشان افهم اكتر وعرفت ان دى قرعه والى بيفوز من مصر 4 آلاف شخص تقريبا وان فى ناس كتير جدا بتقدم فيها ونسبة الفوز صغيره جدا لكن كان عندى يقين بالله انى هفوز

وعرفت كمان ان لو نجحت هعمل مقابله فى السفاره الامريكية والرسوم بتاع المقابله 330$ وعرفت ان لو نجحت محتاج عنوان شخص فى امريكا علشان الاورق بتاعتى تيجى عليه ودى النقطه الى كنت فاكر انها صعبه شوية لان انا مش عارف اي حد فى امريكا

بس وانا بتفرج على اليوتيوب على شخص مصرى فى امريكا كان عامل فيديو دخلت على الفيس بتاعه وبعتله اضافه وقبل الاضافه واتعرفت عليه وقولتله انى من متابعينك على يوتيوب واتصحبت عليه وعديت الايام وفى وبعد عده أشهر ربنا رزقني بمولود سميته نادر ونادر هو كان وش السعد عليا فى كل حاجه حيث اني بعد ولادته دخلت اشوف النتيجه وانا بجيب النتيجه طلعت ليا صفحة الفوز وعمرى ما هعرف اوصف الفرحه الى كنت فيها وبعدين جيت نتيجه زوجتى خسرت بس احنا كدا كدا خلاص مش عايزين نتيجى زوجتى لان هى كدا كدا معايا بس المشكلة الى كنت مش فاهمها انى ازى هخد ابني معانا

سالت عن اي مكتب سفر يقدر يساعدنى ولا يقولى اعمل وفعلا عرفت مكتب كويس وقالى اعمل اي باالظبط وخد منى 100 جنية وبكدا انا لحد هنا دفعت 110جنية خلينا فكرين

والفتره الى بعد الفوز دى اشتغلت على نفسى فى اللغه جدا انا وزوجتى اون لاين مجانى خالص وكان رقم الفوز بتاعى بعيد شوية فكان معايا وقت وكنت عامل جمعية انا وناس من المنطقه وخدت الجمعية دى وكانت جمعية كبيره تغطى فلوس السفر بالكامل والفتره دى بدات أجمع الاورق بتاعتى وبتاع زوجتى وبتاعه ابنى وجمعت كل الاورق دى وترجمتها فى مكتب معتمد فى القاهره ب 750 جنية وكدا يبقا 860 جنية وكنت فى الفتره دى فى انتظار الجواب التانى بتاع المقابله والجواب ده وصل فى بعد حوال 8 أشهر

وقبل المقابله بااسبوعين روحت عملت الكشف الطبى طلب منى 7 صور لي و 7 صور لزوجتي و7 صور ل ابنى+ جوار السفر لكل واحد منا و صورة + خطاب الفوز وسالنا اسئله عادية جدا عملت عملية جراحية قبل كدا قولتله لا. حصلك كسر قبل كدا ؟ قولته لا بعد كدا عملت الكشف الطبى وطلب منى 1500 جنية للفرد دفعت 3000 جنية و300 جنية على الكشف بتاع ابني

وبكدا يبقا حتى الان 4160 جنية بعدين سلمنا ملف لكل فرد وقال لا يجب عليك فتحه ابدا واديتنى الممرضة ورقة اللقاحات وقالت يجب طباعها والاحتفاظ بها لانه ستحتاجها في المطار اوفي الجامعات اذا كنت تنوي الدراسة ويوم المقابلة وصلنا من الساعة 7:00 صباحا السفاره كان فى صفين واحد للهجرة وواحد للسياحة انتظرنا شوية وتم التفتيش فى شباك كدا طلب منى رسالة الموعد و جوازات السفر وصورة لكل شخص بعدين تم تفتيش دقيق تانى بعدين دخلت الى القاعة بعد شوية سمعت اسمي انى اروح شباك دفع المصاريف دفعت لزوجتى 330 دولار و 330 دولار ليا و330 دولار لـ ابنى وادونا 3 اورق صغيره تاكد اني دفعت وطلبت مني ان اجلس تانى ودفعت بالمصرى تقريبا 15 الف و 840 جنيه وبكده الحساب وصل تقريبا 20 الف جنيه

وبعد شوية سمعت اسمى تانى روحت على الشباك طلب منى فى الشباك ده ورقة الدفع والاروق بتاعتنا الى هى شهادة الميلاد + ترجمتها وشهادة الجيش + ترجمتها والفيش والتشبه + ترجمته وعقد الزواج + ترجمته + نسخة مطابقة للاصل وشهاده الثانوية + ترجمتها+ نسخة مطابقة للاصل والكشف الطبى وصوره وجواب الموعد وورقه ارامكس وطلب الاورق بتاع زوجتى وابنى ونفس الورق تقريبا لزوجتي من شهاده الميلاد والثانويه العامه والفيش والتشبيه والكشف الطبي لزوجتي وطفلي

وبعدين طلب منى الجلوس والانتظار وبعد حوالي 10 دقائق سمعت اسمى تانى والمره دى كانت مقابله موظف السفاره لم جيت عنده قولت صباح الخير قالى صباح الخير باالعربى المكسر سالنا كام سؤال بسيط جدا زى

اين ستذهب في الولايات المتحدة؟ قولتله بورتلاند، أوريجون ومتى حصلت على شهاده الثانوية ؟ قولتله 2004

موعد الزوج ؟ قولتله يوم 7 شهر 8 سنه 2014 هل فى شخص هيستقبلك ؟  قولتله لا

من هو الشخص الذى سوف ياتى على عنوانه الجرين كارد ؟ قلت له صديقي وسال عنوان صديقك ؟  قولتله حي بيرل ديستريكت مدينة بورتلاند ولاية أوريغون كيف داخل صديقك امريكا ؟  قولتله عن طريق الهجره

كانت الاجابه بتاعتى كلها مباشره بعد السؤال على طول  بعدين قالى فيزا مقبوله مبروك قولتله الله يبارك فيك

وبعد الخروج من السفاره نزلت على معرض ملابس انا وزوجتى وابنى جبت ملابس با 3800 لينا احنا التلاته وبكدا الحساب وصل 23 الف و 800 جنيه

لما روحت البيت دخلت على الموقع ودفعت رسوم الجرين كارد 220 $ ليا و220 لزوجتى و220 ل ابنى بالمصرى حوالي 11 الف و 220 جنيه وبكده يبقي الحساب وصل 35 الف تقريبا ولم روحت استلم الباسبور دفعت 150 جنية يبقا كدا الحساب وصل 35 الف و 180 جنيه وحجزت تذاكر طيران من شركة مصر للطيران والحجز ده ب 17 الف و 90 جنيه وبكدا الحساب وصل 57 الف و 780 جنيه تقريبا

وقبل السفر بردو عملت حجز فى فندوق اسبوع ب 4760 جنية مصرى ويوم السفر كنت خايف ومبسوط فى نفس الوقت خايف من الفتره الاولى ومبسوط من السفر واول خطوة فى تحقق الاحلام وركبت الطايره وبعد 13 ساعه و20 دقيقه وصلت مطار بورتلاند نزلت من الطايره قعدنا شوية فى الانتظار ولما خرجت من المطار ركبت تاكسي ب 15 دولار لحد الفندق ولم وصلت الفندق خدت رقم الغرفه ودخلت الغرفه انا وزوجتى وابنى نمت لحد تانى يوم من تعب السفر

صحيت تانى يوم روحت اقبل الراجل الى خدت عنوانه ده ورحت فتحت صندوق بريد ب 150$ ورحت مع الرجل ده نشوف شقه كدا علشان نسكن فيها ولقيت شقه كويسه ومناسبه وكان الايجار 980$ فى الشهر وكان فى شرط انى ادفع شهرين مقدم وفعلا دفعت شهرين مقدم 1960$ باالمصرى يعني تقريبا 33 الف و 320 جنيه وانا كنت وخد معايا 3400$ كل المصريف بتاعنا لحد الشقه والاكل والشرب لحد اول شهر شغل وصلت تقريبا 115 الف و 600 جنيه

نقلت إلي الشقه بعد 3 ايام واستنيت لم وصل السوشيال سكيورتي ونزلت فتحت حساب فى البنك ودورت على شغل ومن اول يوم ربنا كرمنى واشتغلت فى سوبر ماركت والساعه كانت ب 12$ كلمت مدير المكان وقولتله انى زوجتي بدور على شغل وبعد اسبوع طلب منى انها تيجى قولتله ان زوجتى معاها طفل قالى مفيش مشكلة هى هتشتغل كاشير وجت زوجتى واشتغلت بالساعه برضه با 12 $

والسوبر ماركت كان قريب جدا من الشقه بننزل كل يوم انا وزوجتى والشغل وبنخد ابنى معانا وانا مرتاح جدا فى الشغل هنا وزوجتى كمان مرتاحه فى الشغل هنا الراتب بتاعى وبتاع زوجتى على بعض 5000$ فى الشهر بالمصرى 85000 جنية بس احنا فى امريكا هنا مش بنحسب بالمصرى لان هنا الدولار زى الجنية فى مصرالاكل ارخص حاجه فى امريكا واي حاجه فى مصر موجوده هنا حتى البصل الاخضر موجود فى امريكا يمكن الحاجه الى مش موجوده فى امريكا كتير الفول والطعمية والكشرى الحاجات الى المصرين بتحبها اوى وزوجتى دلوقتى قدمت دراسه فى جامعة بورتلاند السنه دى وان شاء الله هقدم انا كمان بس شوية كدا وحياتنا مستقره والحمد لله